Bismillaah-Hir-Rahamaanir-Raheem

Behatreen Ziṅdagī Kā Nusḳḥā

Zabur 34

Maiṅ hameshā Allaah taa’alā kā shukrguzaar rahuṅgā;

maiṅ kabhī bhī uskī hamd-o-sanā karnā baṅd naheeṅ karuṅgā.⁽¹⁾

 

Maiṅ uskī nematoṅ kā shukriyā adā kartā huṅ;

duā kartā huṅ ki jo zulm ke shikaar haiṅ isko sun kar ḳḥush ho jaaeṅ!⁽²⁾

 

Āo mere saath Allaah taa’alā kī azmat kā ailaan kareṅ;

āo ham sab uske naam kī taareef kareṅ.⁽³⁾

 

Maine Allaah taa’alā kī ibaadat karī aur usne merī duaaoṅ ko sunā;

usne mujhe har ḏar se āzaad kar diyā.⁽⁴⁾

 

Museebat ke sataae hue us se hī madad maaṅgeṅ aur ḳḥush ho jaaeṅge;

aur wo kabhī sharmiṅdā naheeṅ hoṅge.⁽⁵⁾

 

Laachaar use hī pukaarte haiṅ aur wo unkī pukaar ko sun letā hai;

wo unko har pareshaanī se nijaat dilaatā hai.⁽⁶⁾

 

Uske farishte un logoṅ kī hifaazat karte haiṅ jo uskī izzat karte haiṅ;

aur wo unko har ḳḥatre se bachaatā hai.⁽⁷⁾

 

Tum ḳḥud hī bataao ki Allaah taa’alā kitnā accẖā hai.

Wo log ḳḥushnaseeb haiṅ ki jinko uskī panaah milī.⁽⁸⁾

 

E Allaah ke bandoṅ, us rab kī izzat karo.

Uskā kahnā maanne waaloṅ kī har zarurat purī hotī hai;⁽⁹⁾

yahaaṅ tak ki sher bhī khaane kī kamī se bhukhā ho jaatā hai,

lekin jo bhī Allaah taa’alā par īmaan rakhtā hai usko kabhī nematoṅ kī kamī naheeṅ hotī.⁽¹⁰⁾

 

E mere naujawaan dostoṅ, yahaaṅ āo, merī baat suno,

aur maiṅ tumko sikhaauṅgā ki Allaah taa’alā kī izzat kaise karnī chaahie.⁽¹¹⁾

 

Kyā tum ek behatreen ziṅdagī jeenā chaahte ho?

Kyā tumko lambī umr aur ḳḥushiyaaṅ chaahie?⁽¹²⁾

To phir ġalat bolne se parahez karo,

jhuṯ bolne se bacho.⁽¹³⁾

Buraaī se muṅh moḍ lo aur nek kaam karo;

sukun haasil karne ke liye dil-o-jaan se lag jaao.⁽¹⁴⁾

 

Allaah taa’alā nek logoṅ kī dekhbhaal kartā hai

aur unkī pukaar ko suntā hai;⁽¹⁵⁾

lekin Allaah taa’alā ġalat kaam karne waaloṅ ke ḳḥilaaf ho jaatā hai,

aur unke marne ke baad duniyā unheṅ bhulā detī hai.⁽¹⁶⁾

 

Allaah taa’alā nek logoṅ kī pukaar ko suntā hai;

aur wo unheṅ har museebat se nijaat detā hai.⁽¹⁷⁾

 

Allaah taa’alā unke qareeb hai jinke hausle past ho chuke haiṅ;

wo unko bachaatā hai jinhone ummeed kā daaman cẖoḍ diyā hai.⁽¹⁸⁾

 

Accẖe log bahut pareshaaniyoṅ kā saamnā karte haiṅ;

lekin Allaah rabbul kareem unheṅ nijaat detā hai.⁽¹⁹⁾

 

Allaah taa’alā unkī purī tarah se hifaazat kartā hai;

aur unko zarā bhī nuqsaan naheeṅ uṯhaanā paḍtā.⁽²⁰⁾

 

Buraaī beeemaan logoṅ ko ḳḥatm kar degī;

nek logoṅ se nafrat karne waaloṅ ko sazā milegī.⁽²¹⁾

 

Allaah taa’alā apne logoṅ ko bachā legā;

jo bhī uskī panaah me jaaegā, wo mahafuz ho jaaegā.⁽²²⁾