Bismillaah-Hir-Rahamaanir-Raheem

Bhaaī Kī Saazish

Iṅjeel : Mattā 18:15-35

[Īsā^(a.s) ne bataayā ki tumheṅ kyā karnā chaahie jab koī tumhaare ḳḥilaaf saazish kare. Unhone kahā,] “Agar tumhaarā bhaaī tumhaare saath saazish kare, to tum use akele me uskī ġaltī kā ehasaas dilaao. Agar wo tumhaarī baat maan jaae to tumne apne bhaaī se rishte ko phir se mazbut kar liyā.⁽¹⁵⁾

“Agar wo tumhaarī baat maanne se inkaar kar de, to tum uske paas phir se jaao aur is baar ek yā do logoṅ ko bhī saath le jaao. [Jaisā ki Taurait shareef me likhā hai:] ‘Do logoṅ kī gawaahī jurm saabit karne ke liye kaafī hai.’^[a](16)

“Agar wo un logoṅ kī baat bhī sunne se inkaar kar de, to phir ye baat apnī jamaat ko batā do. Agar wo un logoṅ kī baat maanne se bhī inkaar kar de, to phir tum apne bhaaī se aisā suluk karo ki jaise wo ek but parast aur beeemaan ṯaiks wasul karne waalā hai.⁽¹⁷⁾

“Haqeeqat ye hai ki tumko parwardigaar ne is baat par hukumat dī hai ki tum jis cheez par bhī chaaho us par paabaṅdī lagaao yā uskī ijaazat do.⁽¹⁸⁾ Agar koī do log kisī ek baat par raazī hote haiṅ, aur phir uske liye duā karte haiṅ, to merā parwardigaar tumhaare liye us duā ko qubul karegā.⁽¹⁹⁾ Kyuṅki, jab bhī tum do yā teen log mil kar mere naam ke waseele se duā maaṅgoge, to maiṅ tumhaare saath maujud houṅgā.”⁽²⁰⁾

Tab Īsā^(a.s) ke shaagird janaab Patras ne paas ā kar unse pucẖā, “Ustaad, jab merā bhaaī mere ḳḥilaaf saazish kare to maiṅ usko kitnī baar maaf karuṅ? Kyā maiṅ usko saat baar maaf karuṅ?”⁽²¹⁾

Īsā^(a.s) ne jawaab diyā, “Maiṅ kahtā huṅ ki tum usko saat baar se zyaadā maaf kar do. Agar wo tumhaare saath sattar gunā saat baar bhī saazish kare to bhī use maaf kar do.⁽²²⁾

“Suno! Allaah rabbul azeem kī saltanat us baadshaah ke jaisī hai ki jo apne naukroṅ se apnā qarz wasul karne kā faislā kartā hai.⁽²³⁾ Wo baadshaah apne naukroṅ se paisā wasul karnā shuru kartā hai. Ek naukar ke upar uskā das hazaar sone kī thailiyoṅ kā qarzā thā.^[b](24) Lekin uske paas use adā karne ke liye paise naheeṅ the. To us baadshaah ne hukm diyā ki us naukar ko aur uskā sab kucẖ bech diyā jaae, yahaaṅ tak ki uskī beewī aur bacche ko bhī taaki us paise se baadshaah ke qarz ko wasul kiyā jā sake.⁽²⁵⁾

“Us naukar ne apne ghuṯnoṅ par baiṯh kar baadshaah se fariyaad karī, ‘Mere upar raham keejie. Maiṅ apne saare qarz ko chukā duṅgā.’⁽²⁶⁾ Baadshaah ko apne naukar par raham ā gayā. To baadshaah ne us naukar ke qarze ko maaf kar ke use āzaad kar diyā.⁽²⁷⁾

“Baad me, us naukar ko dusrā naukar milā jisne us se chaaṅdī ke sau sikke qarz me liye the. Usne dusre naukar kā girebaan pakaḍ liyā aur kahā, ‘Mujh se liye chaaṅdī ke sikke waapas karo!’⁽²⁸⁾

“Dusre naukar ne apne ghuṯnoṅ par baiṯh kar usse fariyaad karī, ‘Mere upar raham karo! Maiṅ apnā saarā qarz adā kar duṅgā.’⁽²⁹⁾

“Lekin us naukar ne raham karne se inkaar kar diyā. Usne dusre naukar ko qaidḳḥaane me us waqt tak ke liye ḏalwā diyā jab tak wo uskā qarz adā naheeṅ kar detā.⁽³⁰⁾ Jab baaqī naukroṅ ne ye sab dekhā to unheṅ bahut burā lagā. Wo sab baadshaah ke paas gae aur saarā qissā bayaan kar diyā.⁽³¹⁾

“Tab baadshaah ne us naukar ko bulwaayā aur kahā, “E gunaahgaar naukar! Tune mujhse raham kī fariyaad kī aur maine tere qarz ko maaf kar diyā.⁽³²⁾ Jis tarah se maine tujh par raham kiyā thā usī tarah se tujhe dusre naukar par raham karnā chaahie thā.⁽³³⁾ Baadshaah ko us par bahut ġussā āyā aur usko qaidḳḥaane ke daroġā ke hawaale kar diyā. Usko tab tak qaid me rakhne ke liye kahā jab tak wo apne saare qarz ko adā naheeṅ kar detā.⁽³⁴⁾

“Us baadshaah ne bhī wahī kiyā jo merā parwardigaar un logoṅ ke saath karegā jo apne bhaaī ko dil se maaf naheeṅ kareṅge.”⁽³⁵⁾

[a] Taurait : Iaadā 19:15

[b] Das hazaar sone kī thailiyaaṅ us zamaane me do laakh saal kī mazdurī ke baraabar theeṅ. Iskā matlab ki us naukar ko wo qarz adā karne ke liye do laakh saal tak mazdurī karnī paḍtī, jo ki mumkin naheeṅ thā.