Bismillaah-Hir-Rahamaanir-Raheem
Yaahyā(a.s) Kī Paidaaish Kā Elaan
Iṅjeel : Luqaas 1:5-25
Ye us waqt kī baat hai jab baadshaah Herodes mulk Yahudiyā par hukumat kartā thā. Us daur me Zakriyā(a.s) naam ke ek imaam the. Wo imaamoṅ kī jamaat ke membar the aur us jamaat ke raahanumā janaab Abiyaah the. Zakriyā(a.s) aur unkī beewī Elishibā, Haarun(a.s) kī aulaadoṅ me se the.(5) Allaah taa’alā ne dekhā ke Zakriyā(a.s) aur unkī beewī Elishibā nek logoṅ me se haiṅ aur wo us par īmaan bhī rakhte haiṅ. Wo donoṅ Allaah taa’alā ke hukm par amal karte the.(6) Zakriyā(a.s) aur unkī beewī Elishibā ke koī aulaad naheeṅ thī aur wo donoṅ hī bahut buḍhe ho chuke the.(7)
Ek din jab Zakriyā(a.s) ke jamaat kī baarī āī to wo us jamaat me se Allaah taa’alā kī ḳḥidmat me lag gae.(8) Imaamoṅ ke taur tareeqe ke hisaab se Zakriyā(a.s) ke naam kī parchī niklī to unko Baitul Muqaddas me ḳḥidmat aur ḳḥushbu jalaane ke liye chunā gayā.(9) Jis waqt wo ḳḥushbu jalaaī jaatī thī to wahaaṅ logoṅ kī bheeḍ jamā ho jaatī thī aur wo sab Allaah taa’alā se duā maaṅgte the.(10) Allaah taa’alā kā ek farishtā Zakriyā(a.s) ke saamne haazir huā aur ḳḥushbu jalaane waalī mez ke seedhe haath kī taraf khaḍā ho gayā.(11) Jab Zakriyā(a.s) ne farishte ko dekhā to unko bahut taajjub huā aur wo ghabrā gae.(12)
Allaah taa’alā ke farishte ne un se kahā, “Zakriyā(a.s), āp ḏarie naheeṅ. Allaah taa’alā ne āpkī duaaoṅ ko sun liyā hai.[a] Āp kī beewī Elishibā, ek laḍke ko paidā karegī. Āp uskā naam Yaahyā(a.s) rakhiegā.(13) Woāp ke liye bahut ḳḥushī le kar āegā aur bahut saare log uskī paidaaish se bahut ḳḥush hoṅgeṅ.(14) Yaahyā(a.s) Allaah taa’alā ke azeem logoṅ me se hoṅge. Wo kabhī bhī sharaab ko haath naheeṅ lagaaeṅge. Jab wo paidā hoṅge to wo Allaah taa’alā ke nur se raushan hoṅge.(15) Wobahut saare Ibraaniyoṅ ko Allaah taa’alā kī nek raah par waapas le kar jaaeṅge.(16) Yaahyā(a.s) ko Allaah taa’alā kī taraf se bhejā jaayegā taakī wo logoṅ ko hidaayat deṅ aur unko Allaah taa’alā kī hukumat me jaane ke liye taiyaar kar sakeṅ. Wo Allaah taa’alā kī marzī ko purā karne ke liye paiġambar Ilyaas(a.s) kī ruhaanī taaqat se raushan hoṅge. Wo waalidoṅ ke diloṅ me unke bacchoṅ ke liye muhabbat paidā kareṅge. Wo un logoṅ ko badleṅge jo log kahnā naheeṅ maante haiṅ aur wo unko kahnā maanne waale logoṅ jaisī samajh deṅge; is tarah se wo logoṅ ko Allaah taa’alā kī saltanat me āne ke liye taiyaar kareṅge.”(17)
Zakriyā(a.s) ne farishte se kahā, “Maiṅ is baat par kaise yaqeen karuṅ ke ye sab hone waalā hai? Maiṅ ek bahut buḍhā ādmī huṅ aur merī beewī bhī buḍhī hai.”(18)
Farishte ne unheṅ jawaab diyā, “Maiṅ Jibraaeel ameen(a.s) huṅ. Maiṅ Allaah taa’alā ke huzur me khaḍā rahtā huṅ. Allaah taa’alā ne mujhe ye accẖī ḳḥabar sunaane ke liye yahaaṅ bhejā hai.(19) Ab, āp sunie! Āp kucẖ bhī naheeṅ bol paaeṅgeṅ jab tak ye sab ho naheeṅ jaatā. Āpkī āwaaz chalī jaaegī kyuṅki āp ne merī bataaī huī baat par yaqeen naheeṅ kiyā. Lekin maine jaisā bhī kahā hai wo apne waqt par hī hogā.”(20)
Baitul Muqaddas ke baahar, log abhī bhī Zakriyā(a.s) kā iṅtazaar kar rahe the. Wo sab soch rahe the ke Zakriyā(a.s) aṅdar itnī der se kyā kar raheṅ haiṅ.(21) Lekin jab Zakriyā(a.s) baahar āe, to wo logoṅ se bol naheeṅ paae. Zakriyā(a.s) logoṅ se ishaare me bataane kī koshish kar rahe the kī unko Baitul Muqaddas me bashaarat huī hai, lekin wo kisī se baat naheeṅ kar paae.(22) Jab unkā Baitul Muqaddas me imaamat kā kaam ḳḥatm huā to wo waapas apne ghar chale gae.(23) Baad me, Zakriyā(a.s) kī beewī, Elishibā, haamilā hueeṅ. Wo paaṅch maheene tak apne ghar se baahar naheeṅ nikleeṅ. Elishibā ne kahā,(24) “Dekhie Allaah taa’alā ne mere liye kyā kiyā hai! Usne apnī rahamat mere upar naazil karī hai. Allaah taa’alā ne mujhe logoṅ ke saamne sharmiṅdā hone se bachā liyā hai.”(25)