Bismillaah-Hir-Rahamaanir-Raheem

Kal Kī Fikr Mat Karo

Iṅjeel : Mattā 6:19-34

[Īsā^(a.s) logoṅ ko daulat jamā karne ke baare me batā rahe the. Unhone kahā:] “Tum apne liye zameen par daulat jamā mat karo. Keeḍe aur zaṅg usko barbaad kar deṅge aur chor ghar me ghus kar usko churā le jaaeṅge.⁽¹⁹⁾ Tum apnī daulat ko jannat me jamā karo, jahaaṅ par keeḍe aur zaṅg use barbaad naheeṅ kar sakte aur nā hī chor use churā sakte haiṅ.⁽²⁰⁾ Jahaaṅ bhī tumhaarī daulat hogī tumhaarā dil bhī waheeṅ par lagegā.⁽²¹⁾

“Iṅsaan ke jism me roshnī āṅkh se ho kar ātī hai. To agar tumhaarī āṅkh accẖī hai, to tum saaf dekh sakte ho aur tumhaarā purā jism roshnī se bhar jaaegā.⁽²²⁾ Lekin agar tumhaarī āṅkh ḳḥaraab hai aur tum dekh naheeṅ sakte, to tumhaarā purā jism aṅdhere se bharā huā hogā. Islie agar tum apne aṅdar ke aṅdhere ko roshnī samajh rahe ho, to tumhaare aṅdar kā aṅdherā kitnā zyaadā hogā.⁽²³⁾

“Tum ek saath do maalikoṅ kī ḳḥidmat naheeṅ kar sakte. Tum unmeṅ se ek ko pasaṅd karoge aur dusre se nafrat, yā tum ek kā kahnā maanoge aur dusre kī naafarmaanī karoge. Tum ek saath Allaah taa’alā aur daulat kī ḳḥidmat naheeṅ kar sakte!⁽²⁴⁾

“Isī wajah se maiṅ tumko bataatā huṅ, apnī ziṅdagī ke baare me fikr mat karo, ki tum kyā khaaoge aur kyā piyoge tum nā hī apne jism ke baare me socho, ki tum us par kyā pahanoge. Ziṅdagī khaane se kaheeṅ zyaadā qeemtī hai aur jism un kapḍoṅ se zyaadā qeemtī hai jo tum uspar pahante ho.⁽²⁵⁾ Chiḍiyoṅ ko dekho, wo nā hī fasal ugaatī haiṅ, nā hī kaaṯtī haiṅ aur nā hī unko godaam me saṁbhaal kar rakhtī haiṅ, balki tumhaarā rab unko khaanā khilaatā hai. Kyā tumko naheeṅ patā ki tumhaarī ahamiyat chiḍiyoṅ se kaheeṅ zyaadā hai?⁽²⁶⁾ Tum zyaadā soch kar bhī apnī lambaaī zarā bhī baḍhā naheeṅ paaoge!⁽²⁷⁾

“Aur tum kapḍoṅ kī fikr kyuṅ karte ho? Tum maidaan me lage in jaṅglī phuloṅ par nazar ḏaalo. Dekho ye kis tarah ugte haiṅ. Nā hī ye kaam karte haiṅ aur nā hī apne liye kapḍe banaate haiṅ.⁽²⁸⁾ Maiṅ tumko bataatā huṅ, Sulemaan^(a.s) nabī, jo azeem aur ameer baadshaah the, unhone bhī in phuloṅ jaise ḳḥubsurat kapḍe naheeṅ pahne.⁽²⁹⁾ Allaah rabbul ālameen phuloṅ ko kitne ḳḥubsurat kapḍe pahanaatā hai jo āj ziṅdā haiṅ aur kal mar jaaeṅge. Kyā tumhaarā rab tumhaare liye isse zyaadā naheeṅ karegā? Tum logoṅ kā īmaan kitnā kamzor hai!⁽³⁰⁾

“To islie tum, pareshaan nā ho aur ye nā kaho, ‘Ham kyā khaayeṅge?’ ‘Ham kyā piyeṅge?’ Yā ‘Ham kyā pahaneṅge?’⁽³¹⁾ Wo log jo Allaah taa’alā ko naheeṅ jaante hameshā in sab cheezoṅ ke liye hī pareshaan rahte haiṅ. Tum log bilkul bhī pareshaan nā ho, Allaah rabbul azeem sab jaanne waalā hai ki tumheṅ kab kis cheez kī zarurat hai.⁽³²⁾ Iske bajaae, hameshā Allaah taa’alā kī saltanat kī ḳḥwaahish karo aur use haasil karne ke liye nek ban jaao. Tab tumheṅ jis cheez kī bhī zarurat hogī to wo tumko ḳḥud mil jaaegī.⁽³³⁾

“To islie kal kī fikr nā karo. Har din kī apnī ḳḥud kī museebateṅ haiṅ aur kal kī apnī ḳḥud kī pareshaaniyaaṅ.”⁽³⁴⁾