Bismillaah-Hir-Rahamaanir-Raheem

Allaah Rabbul Azeem Kī Saltanat Kī Misaaleṅ

Iṅjeel : Mattā 13:24-52

Īsā^(a.s) ne logoṅ ko kucẖ aur misaaleṅ deeṅ. Unhone kahā, “Allaah rabbul azeem kī baadshaahat us ādmī kī tarah hai ki jisne apne khetoṅ me accẖe beej boe.⁽²⁴⁾ Us raat, jab wo so rahā thā, to uske dushman ne ā kar gehuṅ ke beech me jaṅglī ghaas bo dī aur wahaaṅ se chalā gayā.⁽²⁵⁾ Kucẖ waqt ke baad gehuṅ kī fasal baḍhne lagī aur gehuṅ baaliyoṅ se bhar gayā, lekin uske saath-saath wo jaṅglī ghaas bhī baḍī ho gaī.⁽²⁶⁾ Tab us khet ke maalik kā naukar uske paas āyā aur kahā, ‘Āp ne apne khet me to accẖe beej boe the to phir ye jaṅglī ghaas kahaaṅ se ā gaī?’⁽²⁷⁾ Us ādmī ne jawaab diyā, ‘Ek dushman ne inko lagaayā hai.’ Tab naukar ne pucẖā, ‘Kyā āp chaahte haiṅ ki ham isko noch kar pheṅk deṅ?’⁽²⁸⁾ Us ādmī ne jawaab diyā, ‘Naheeṅ, kyuṅki jab tum us ghaas ko ukhaaḍoge to saath me gehuṅ bhī ukhaḍ saktā hai.⁽²⁹⁾ Fasal pakne tak us jaṅglī ghaas ko gehuṅ ke saath hī ugne do. Fasal kaaṯte waqt maiṅ majduroṅ se kahuṅgā: Pahale jaṅglī ghaas ko kaaṯo aur uskā gaṯhṯhar baaṅdh kar jalā do. Tab gehuṅ ko jamā karo aur mere godaam me le āo.”⁽³⁰⁾

Phir Īsā^(a.s) ne ek aur misaal dī: “Allaah rabbul azeem kī saltanat sarsoṅ ke beej ke jaisī hai. Ek ādmī apne khetoṅ me beej botā hai.⁽³¹⁾ Wo beej sab beejoṅ me cẖoṯā hotā hai lekin jab ugtā hai to sabse baḍe paudhoṅ me se ek hai. Wo itnā baḍā ho jaatā hai ki uskī ḏaaliyoṅ me jaṅglī chiḍiyaaṅ apnā ghoṅslā banaatī haiṅ.”⁽³²⁾ Aur phir unhone ek aur misaal dī: “Allaah rabbul azeem kī saltanat ḳḥameer ke jaisī hai jo ek aurat bahut saare āṯe me milaatī hai. Ḳḥameer pure āṯe me phail jaatā hai.”⁽³³⁾ Īsā^(a.s) kahaaniyaaṅ sunā kar logoṅ ko saarī baateṅ bataayā karte the. Wo hameshā logoṅ ko samjhaane ke liye kahaaniyaaṅ (yā misaaleṅ) sunaayā karte the.⁽³⁴⁾ Nabī ne Zabur-e-paak me ye kahā hai: “Maiṅ misaaloṅ kī zabaan boluṅgā; maiṅ un cheezoṅ ke baare me bataauṅgā jo zameen ke banne ke waqt se ek raaz haiṅ.^[a]”⁽³⁵⁾

Phir Īsā^(a.s) bheeḍ se uṯh kar ghar ke aṅdar chale gae. Unke shaagird unke paas āe aur kahā, “Hameṅ khetoṅ me jaṅglī ghaas waalī misaal kā matlab samajhaaie.”⁽³⁶⁾ Īsā^(a.s) ne jawaab diyā, “Wo ādmī jisne apne khetoṅ me accẖe beej boe wo iṅsaan kā beṯā hai.⁽³⁷⁾ Khet ek duniyā hai aur accẖe beej wo saare log haiṅ jo Allaah rabbul azeem kī baadshaahat me haiṅ. Jaṅglī ghaas wo log haiṅ jo log Shaitaan ke saath haiṅ.⁽³⁸⁾ Aur wo dushman jisne ḳḥaraab beej boe the wo Shaitaan hai. Qayaamat fasal ke kaaṯne kā waqt hai aur jo fasal ko jamā karte haiṅ wo farishte haiṅ.⁽³⁹⁾

“Jaṅglī ghaas ko ukhaaḍ kar āg me jalā diyā gayā. Āḳḥir ke dinoṅ me isī tarah se hogā.⁽⁴⁰⁾ Insaan kā beṯā farishtoṅ ko bhejegā. Wo Allaah taa’alā kī saltanat me se aise logoṅ ko jamā kareṅge ki jin logoṅ ne bure kaam karwaae aur wo saare log jinhone shaitaanī kaam kiye haiṅ.⁽⁴¹⁾ Farishte unko ek bhaḍaktī huī āg me pheṅk deṅge aur wahaaṅ par log apne daaṅt pees-pees kar dard se roeṅge.⁽⁴²⁾ Tab accẖe log apne rab kī saltanat me suraj kī tarah chamkeṅge. Agar tumhaare paas kaan haiṅ, to merī baatoṅ ko dhyaan se suno!”⁽⁴³⁾

[Iske baad Īsā^(a.s) ne unko ek aur misaal dī. Unhone kahā:] “Allaah rabbul azeem kī baadshaahat khet me ek gaḍe ḳḥazaane kī tarah hai. Ek din ek ādmī us ḳḥazaane ko ḏhuṅḏh letā hai aur phir usko waapas zameen me gaaḍ detā hai. Wo ādmī ḳḥazaanā milne se itnā ḳḥush ho jaatā hai ki apnā sab kucẖ bech kar us zameen ko ḳḥareed letā hai.⁽⁴⁴⁾ Allaah rabbul azeem kī baadshaahī us ādmī kī tarah hai jo sacchā motī ḏhuṅḏh rahā ho.⁽⁴⁵⁾ Aur ek din usko wo qeemtī motī mil jaae to wo apnā sab kucẖ bech kar wo motī ḳḥareed letā hai.⁽⁴⁶⁾

“Allaah rabbul azeem kī baadshaahī us jaal kī tarah hai ki jisko jheel me pheṅkā jaae aur usmeṅ alag alag tarah kī macẖliyaaṅ phaṅs jaaeṅ.⁽⁴⁷⁾ Jab wo jaal bhar jaatā hai to macẖuaarā usko kinaare tak le ātā hai. Macẖuaarā kinaare par baiṯh kar us jaal me se accẖī macẖliyaaṅ nikaal kar apnī ḏaliyā me rakh letā hai aur ḳḥaraab macẖliyoṅ ko pheṅk detā hai.⁽⁴⁸⁾ Aur āḳḥirī daur me bhī yahī hogā. Farishte āeṅge aur bure logoṅ me se accẖe logoṅ ko alag kareṅge.⁽⁴⁹⁾ Farishte un bure logoṅ ko bhaḍaktī āg me pheṅk deṅge. Ye wo jagah hai jahaaṅ log apne daaṅt pees-pees kar dard se roeṅge.”⁽⁵⁰⁾ Tab Īsā^(a.s) ne pucẖā, “Kyā tum in sab baatoṅ ko samajh gae?” Unhone jawaab diyā, “Jī haaṅ, ham samajh gae.”⁽⁵¹⁾ Phir Īsā^(a.s) ne unse kahā, “Qaanun paḍhaane waale har ustaad jisko Allaah rabbul azeem kī baadshaahī kā ilm diyā gayā hai wo ek makaan ke maalik kī tarah hai. Jiske ghar me nayī aur puraanī cheezeṅ bharī huī haiṅ aur wo unmeṅ se naī aur puraanī cheezeṅ baahar nikaal kar laatā hai.”⁽⁵²⁾

[a] Zabur 78:2