Bismillaah-Hir-Rahamaanir-Raheem

Mere Rab Mujhe Badnaamī Se Bachā

Zabur 25

 

Yā Allaah, maiṅ apne āpko tere hawaale kartā huṅ.⁽¹⁾

 

E mere rab, maiṅ tujh par bharosā kartā huṅ, tu mujhe badnaam naheeṅ hone denā.

Mere dushmanoṅ ko mujh par haṅsne kā mauqā n denā.⁽²⁾

 

Jo koī bhī tujh par īmaan rakhegā wo kabhī badnaam naheeṅ hogā.

Wahī badnaam hogā jo sirf gunaah kartā hai aur kabhī taubā naheeṅ kartā.⁽³⁾

 

Yā Allaah rabbul kareem, mujhe nek raastā dikhā.

Mujhe zindagī ko jeenā sikhā.⁽⁴⁾

 

Mujhe apnī sacchī hidaayat atā kar, e mere parwardigaar,

mujhe nijaat dene waale, maiṅ terī hidaayat kā iṅtazaar karuṅgā.⁽⁵⁾

 

E mere parwardigaar, tu apnī mohabbat aur karam yaad kar.

Jo tune ham par bahut pahale zaahir kiyā thā.⁽⁶⁾

 

Mere gunaahoṅ aur ġalat kaam ko yaad n karnā jo maine jawaanī me kie the.

Lekin mujhe pyaar karnā hameshā yaad rakhnā, kyuṅki tu behatreen hai, e mere rab.⁽⁷⁾

 

Yā Allaah rabbul azeem, tu accẖā aur sacchā hai.

Tu gunaahgaaroṅ ko sach kī taraf le jaatā hai.⁽⁸⁾

 

Tu unko hī sahī raastā dikhaatā hai, jo sahī kaam karne par ġurur naheeṅ karte.

Tu unko apnā seedhā raastā dikhaatā hai.⁽⁹⁾

 

E mere rab, terā raastā pyaarā aur sacchā hai

unke liye jo tujhse kie hue waade par amal karte haiṅ.⁽¹⁰⁾

 

E mere rab, apne naam kī ḳḥaatir, mere gunaahoṅ ko baḳḥsh de.⁽¹¹⁾

 

Allaah rabbul azeem apnī ibaadat karne waale bandoṅ ko

behatreen raaste par le jaaegā.⁽¹²⁾

 

Wo ek behatreen zindagī jiegā aur uske bacche zameen ke waaris hoṅge.⁽¹³⁾

 

Allaah taa’alā apne raaz use bataaegā jo uskī izzat karte haiṅ.

Wo unheṅ apne ahad ke baare me bataaegā.⁽¹⁴⁾

 

Merī āṅkheṅ hameshā tujhe madad ke liye talaash kartī haiṅ.

Tu mujhe har jaal se bachā legā.⁽¹⁵⁾

 

Merī taraf dekh aur mujh par nazre karam kar.

Maiṅ akelā huṅ aur bahut takleef me huṅ.⁽¹⁶⁾

 

Merī mushkileṅ bahut baḍh gaī haiṅ.

Mujhko merī mushkiloṅ se āzaad kar de.⁽¹⁷⁾

 

Dekh maiṅ kaise museebatoṅ me phaṅsā huā huṅ,

tu mere saare gunaahoṅ ko maaf kar de.⁽¹⁸⁾

 

Dekh mere dushman kitne zyaadā haiṅ!

Aur dekh wo mujhse kitnī nafrat karte haiṅ!⁽¹⁹⁾

 

Merī hifaazat kar aur mujhe bachā le.

Maiṅ tujh par bharosā kartā huṅ, mujhe badnaam hone se bachā le.⁽²⁰⁾

 

Maiṅ tujhse hī ummeed rakhtā huṅ

taaki nekī aur īmaandaarī merī hifaazat kar sake.⁽²¹⁾

 

Yā Allaah, tu mere mulk ko har mushkil se mahafuz rakh.⁽²²⁾